كتب الاستاذ محمد الدكروري مجلة اخبار الطبيعة
الصوان فشخرة كدابه
بقلم محمد الدكروري
هو إحنا ليه وصلنا لكده ؟؟؟
يا جماعه يا أصحاب العقول هل الصوان للعزاء للميت ينفع الميت في شيء؟؟ ولا هو فشخرة كدابه !!!!
وليه بنصور الصوان باللي فيه فيديو وليه الصور الفوتوغرافيه هل هي فرحة في الميت أنه مات ولا هي فشخرة كدابه !!!!!
وليه أجيب راجل هيقرأ آيتين من القرآن ياخد عشرين وتلاتين ألف جنيه؟؟ هل الراجل ده هيجيب نقطه لما الناس تسمعه تعود بالنفع المادي على أصحاب الميت ولا هي فشخرة كدابه!!!!!
وليه الراجل إللي ملوش لازمه وماشي طول الوقت بهدوم مزيتة ومقطعه في الصوان تلاقيه لابس جلابيه بلدي وحاطط الشال على كتفه هل هو كده بقي راجل ليه هيبه؟؟ ولا هي فشخرة كدابه!!!!
وليه اشيل واحد من مكانه واقعد مكانه واحد تاني واتفضل يا بيه واتفضل يا باشا هل إللي قام ده كان جربان وعره واللي قعد مكانه فعلاً بيه وباشا ؟؟ ولا هي فشخرة كدابه!!!!!
طيب لو أصحاب الصوان إللي صرفوا عليه الآلاف إللي تعمل فرحين لو طلب منهم يجهزوا بنت يتيمه هيجهزوها ولا هي فشخرة كدابه!!!!
طيب لو أهل الميت عملوا صدقه جاريه تنفع الميت في قبرة من أي أنواع الصدقات مش هتكون أفضل ولا هي فشخرة كدابه!!!!!!
يا أصحاب المظاهر الكدابة ويا أصحاب الفشخرة الكدابه إعلموا أنكم إخوان الشياطين لقول المولي عز وجل.... إن المبذرين كانوا إخوان الشياطين وكان الشيطان لربه كفورا.... فاتقوا الله عباد الله وعودوا إلي رشدكم وسنة نبيكم يرحمكم الله....
تعليقات
إرسال تعليق